Wednesday January 23rd 2019

Insider

Archives

Statement on 19th Anniversary of WLB (Burmese)

PDF1 PDF download ယူရန် 

အမျိုးသမီးများအဖွဲ့ချုပ် (မြန်မာနိုင်ငံ) ၏ ၁၉ နှစ်ပြည့် အထိမ်းအမှတ်သဘောထား ထုတ်ပြန်ချက်

ရက်စွဲ။ ။ ၂၀၁၈ ခုနှစ်၊ ဒီဇင်ဘာလ ၉ ရက်။

အမျိုးသမီးများအဖွဲ့ချုပ် (မြန်မာနိုင်ငံ) သည် တိုင်းရင်းသားတန်းတူရေး၊ ကိုယ်ပိုင်ပြဌာန်းခွင့်ရရှိရေး၊ ဒီမိုကရေစီရေး၊ ဖက်ဒရယ်ရေး၊ ကျား-မ တန်းတူရေးစသည့်တို့ကို လှုပ်ရှားလာသည်မှာ ယနေ့ ၂၀၁၈ ခုနှစ် ဒီဇင်ဘာလ ၉ ရက်နေ့ တွင် (၁၉) နှစ်ပြည့်ပြီဖြစ်သည်။ မိမိတို့သည် တိုင်းရင်းသား ခေါင်းဆောင်များနှင့်အတူတကွ နိုင်ငံရေးအရ ရပ်တည် လာခဲ့သည့်အပြင် ပြည်သူလူထု ရင်ဆိုင်နေရသော အခက်အခဲ ပြဿနာများကို ဖြေရှင်းနိုင်မည့် နည်းလမ်းများ၊ ယန္တရားများကို အကောင်အထည်ဖော်နိုင်ရေးနှင့် ကျား-မတန်းတူရေးအတွက် စည်းရုံးလှုပ်ရှားဆောင်ရွက်နေသည့် အဖွဲ့အစည်း ဖြစ်သည်။

အမျိုးသမီးများသည် မြန်မာနိုင်ငံတွင် နှစ်ပေါင်း (၇၀) ကျော်ကြာ ပြည်တွင်းစစ်ကြီး၏ ဆိုးဒဏ်ကို ခါးစည်းခံလာရ သည်မှာ ယနေ့အချိန်အထိ ဖြစ်သည်။ အမျိုးသမီးများသည် မုဒိမ်းကျင့်ခြင်း၊ သတ်ဖြတ်ခြင်း၊ ညှဉ်းပန်းနှိပ်စက်ခြင်း၊ အတင်းအဓမ္မလုပ်အားစေခိုင်းခြင်း၊ ပေါ်တာဆွဲခြင်း၊ အခြားလိင်ပိုင်းဆိုင်ရာ အကြမ်းဖက်ခြင်း၊ လူမှုအသိုင်းအဝိုင်း များ၏ ခွဲခြားဆက်ဆံခြင်း၊ အင်အားကြီးသူများ၏ အနိုင်ကျင့်ခြင်း စသည်တို့ကို ယနေ့ကာလအထိ ခံစားနေရဆဲ ဖြစ်သည်။

ဤပြည်တွင်းစစ်ကြီးကို အပြီးသတ်ချုပ်ငြိမ်းရန် ရည်ရွယ်၍ ငြိမ်းချမ်းရေးဖြစ်စဉ်ကို ဆောင်ရွက်နေသည်ဟု ဆိုသော် လည်း လက်တွေ့တွင် ယခုငြိမ်းချမ်းရေး ဖြစ်စဉ်သည် ပဋိပက္ခချုပ်ငြိမ်းရေးကို ဖြေရှင်းနိုင်ခြင်းမရှိပဲ ပဋိပက္ခများကို ပိုမို ဖြစ်ပေါ်စေရန် တွန်းအားပေးနေသည်ဟု မိမိတို့ သုံးသပ်သည်။ ဤငြိမ်းချမ်းရေးဖြစ်စဉ်တွင် လက်နက်ကိုင် ပဋိပက္ခ များ၏ ဓါးစာခံအဖြစ် ခံစားခဲ့ကြရသော အမျိုးသမီးထု၏ ကိုယ်စားပြုမှုသည် ဆုံးဖြတ်ချက်ချမှတ်သော နေရာများတွင် လုံလုံလောက်လောက် ရှိမနေခြင်းမှာ မိမိတို့ အမျိုးသမီးထုအတွက် အားပျက်ဖွယ်ရာဖြစ်သည်။ ယခု လုပ်ဆောင်နေ သော ငြိမ်းချမ်းရေးဖြစ်စဉ်သည် အနာဂတ် ဖက်ဒရယ်ပြည်ထောင်စုကို တည်ဆောက်ရန် လမ်းကြောင်းမှန်သို့ ရောက်လိုပါက ပါဝင်ပတ်သက်သူများအနေဖြင့် အားလုံးပါဝင်ရေးမူ ဆုတ်ကိုင်ကာ နိုင်ငံရေးအရ ဖြေရှင်းလိုသည့် စိတ်ဆန္ဒရှိမှုက အထူးအရေးပါသည်ဟု မိမိတို့ သုံးသပ်သည်။ အားလုံးပါဝင်ရေးမူဆိုသည်မှာ နိုင်ငံရေးအရ၊ လူမျိုးရေးအရ ခွဲခြားမှုမရှိသော၊ အဖွဲ့အစည်း အင်အားကြီး၊ အင်အားသေးအပေါ် ခွဲခြားမှုမရှိသော၊ ပြည်သူလူထုကို ကိုယ်စားပြုသော လူထုအခြေပြု အဖွဲ့အစည်းများအား ခွဲခြားမှုမရှိသည့် အထူးသဖြင့် ပဋိပက္ခအတွင်း ဓါးစားခံများ ဖြစ်ခဲ့ရသော ပြည်သူလူထု၏ ကိုယ်စားပြုမှု ရှိသင့်သည်ဟုမိမိတုိ့ ယုံကြည်သည်။ ငြိမ်းချမ်းရေးဖြစ်စဉ်တွင် တန်းတူရေးကို အခြေမခံသည့်အပြင် အားလုံးပါဝင်မှုမရှိပဲ ဆောင်ရွက်ပါက ဟန်ပြငြိမ်းချမ်းရေးသာ ဖြစ်နေမည်။ ထို့နည်းတူ ရေရှည်တည်တံ့ခိုင်မြဲသော ငြိမ်းချမ်းရေးကို တည်ဆောက်နိုင်ရန် အလှမ်းဝေးနေဦးမည်ဟု မိမိတို့ ယူဆသည်။

မိမိတို့နိုင်ငံတွင် ဒီမိုကရေစီ အစိုးရ အကူးအပြောင်းဖြစ်ပေါ်နေသော်လည်း အခြေခံလူ့အခွင့်အရေးကို ကန့်သတ် ချုပ်ချယ်နေသော ဥပဒေ များကို ပြင်ဆင်နိုင်ခြင်းလည်းမရှိပဲ လူ့အခွင့်အရေးချိုးဖောက်မှုများ၊ လူသားလုံခြုံရေးနှင့် ပတ်သက်ပြီး အထူးစိုးရိမ်ဖွယ်ရာ အခြေအနေသို့ ရောက်ရှိလာနေသည်။ ထို့အပြင် လူ့အခွင့်အရေး လှုပ်ရှားသူများကို လည်း အပြစ်ပေးအယူခြင်းအပြင် သတင်းမီဒီယာများအား ဖိနှိပ်ချုပ်ချယ်မှုများ ပိုမိုတိုးပွါးလာသည်ကုို အမျိုးသမီးများ အဖွဲ့ချုပ် (မြန်မာနိုင်ငံ) အနေဖြင့် အထူးစိုးရိမ် ပူပန်ပါသည်။ အချို့သော အကြောင်းတရားများမှာ ၂၀၀၈ခု ဖွဲ့စည်းပုံအရ ဖြစ်နေသည်များကိုလည်း မိမိအားလုံးက အထူးသတိမူမိပါသည်။
မိမိတို့အနေဖြင့် လူသားတိုင်းသည် အသက်ဘေးအန္တရာယ်ကင်းရှင်းရေးနှင့် အကြောက်တရားအောက်မှ ကင်းလွတ် ပြီး မိမိဘ၀ ရပ်တည်ရှင်သန်ရေးအတွက် လုံခြုံမှုအပြည့်အ၀ရှိသော လူ့အသိုင်းအဝိုင်းကို ဖော်ဆောင်နိုင်မှသာလျှင် ငြိမ်းချမ်းရေးရှိသည်ဟု ယုံကြည်သည်။

ထို့ကြောင့် မိမိတို့ အမျိုးသမီးများအဖွဲ့ချုပ်(မြန်မာနိုင်ငံ)အနေဖြင့် ရေရှည်တည်တံ့ခိုင်မြဲသော ငြိမ်းချမ်းရေးကို တည်ဆောက်နိုင်ရန်အတွက် ပထမဦးစွာ တိုင်းရင်းသား ဒေသအသီးသီးတွင် စစ်ပွဲများ ရပ်တန့်ရန် တောင်းဆိုသည်။ စစ်ပွဲများအတွင်း ခံစားခဲ့ရသော ပြည်သူလူထုများ၏ ဘဝရပ်တည် ရှင်သန်နိုင်ရေးအတွက် တိုင်းရင်းသား ဒေသ အသီးသီးမှ တိုးချဲ့ထားသော အစိုးရတပ်မတော်များကို ခြွင်းချက်မရှိ နောက်ဆုတ်ပေးရန် တောင်းဆိုတိုက်တွန်းသည်။ ထို့အပြင် ယခုလက်ရှိ ငြိမ်းချမ်းရေးဖြစ်စဉ်တွင် ပဋိပက္ခကြောင့် နစ်နာခဲ့ရသူများနှင့် ဒီမိုကရေစီရေး၊ ဖက်ဒရယ်ရေး တို့တွင် ပါဝင်ဆောင်ရွက်ခဲ့သော သူများအတွက် အမှန်တရား ရရှိစေရန်အတွက် တရားမျှတသော ယန္တရားတစ်ခု တည်ဆောက်ပြီး အကြမ်းဖက်မှုများ ကျူးလွန်သူများကို ကင်းလွတ်ခွင့်မပေးပဲ အရေးယူ ဆောင်ရွက်ပေးရန် တောင်းဆိုသည်။

မိမိတို့ အမျိုးသမီးများအဖွဲ့ချုပ် (မြန်မာနိုင်ငံ) အနေဖြင့်လည်း လူ့အဖွဲ့အစည်းအတွင်း ပြည်သူပြည်သားများ၏ အသက်အိုးအိမ်လုံခြုံရေးကို ထိပါးခြိမ်းခြောက်မှုဖြစ်အောင် ဖန်တီးနေသည့် အကြောင်းအရင်းခံများကို ဆန့်ကျင် ဖော်ထုတ်၍ လူမှုတရားမျှတရေး၊ တန်းတူရေး၊ အခြေခံ လူ့အခွင့်အရေးရှိသည့် လူမှုအသိုင်းအဝိုင်းတစ်ခုနှင့် အမျိုး သမီးများ အမှန်တရားရရှိစေရန်အတွက် ဆက်လက်လုပ်ဆောင်သွားမည်ဟု မိမိတို့မှ သံဓိဌာန်ချမှတ်ကြောင်း သဘော ထားထုတ်ပြန်သည်။
ဆက်သွယ်ရန်
လွေးပိုးငယ် အထွေထွေအတွင်းရေးမှူး ၀၉ ၇၈၁၃၂၉ ၇၄၂
တင်တင်ညို မူဝါဒရေးရာဦးဆောင်အဖွဲ့ ၀၉ ၇၇၂၉ ၁၄၉ ၇၁